التشجيع صفة أساسية لتنمية عقلية الطفل، وتحسين شخصيته وتفكيره وبالتالي لما يكبر يبقى انسان سوي وواثق في نفسه، ناجح ومتفوق في كل مرحلة من مراحل حياته من بدايتها لنهايتها.
فى مؤسسة قيثارة داود للتنمية احنا فخورين بكل قصص أولادنا ونجاحاتهم، وأننا نقدر نساعدهم يكتشفوا قدراتهم ويكبّروها، نشجعهم ونعلمهم خطوة بخطوة ونرجع لهم ثقتهم فى نفسهم عشان يبنوا مستقبلهم بأنفسهم ويكونوا ناجحين.
ومن هنا حكاية الطالبة “ر و”، بفرع نجع حمادى، بتحكى لنا عن تجربتها، وازاى حياتها وشخصيتها اتغيروا للأحسن بسبب التشجيع علي الدراسة:
“انا مكنتش بحب اروح المدرسة وكنت مابحبش اسيب ماما ولا عارفه يبقي ليا اصحاب، كنت دايما مكسوفة لأن المس كانت دايما تزعقلي عشان مكنتش بعرف اجمع واطرح
فـ قعدت فترة ما اروحش المدرسة وبعدين ماما سمعت عن مؤسسة قيثارة داود، وعرفت ان في فصول تقوية، والعيال فيها بيحبوا بعض
وقدِّمت لي، وروحت لقيت المدرسين بيتعاملوا معايا حلو ومحدش بيزعقلي، وابتدوا يعلموني واحدة واحدة، وبيجبولي انا والفصل كله هدايا
وبقي ليا صحاب وبقيت بعرف اجمع واطرح بسهولة وبقيت شاطرة، مش كدة وبس انا كمان بقيت بعرف اضرب الارقام وبقيت شاطرة اوي وبقيت بروح المدرسة وحبيت صحابي وصحابي بقوا بيحبوني اوي وبقيت واثقة في نفسي، انا بحب قيثارة داود”
وعشان كده بنركز مجهوداتنا كمؤسسة هدفها تمكين الفرد أن برامجنا تخدم جميع أفراد الأسرة في النواحي التنموية والتعليمية المختلفة في جميع الأعمار، زي برنامج “أبطال الغد” لسن ابتدائى، وبرنامج “أشبال لكن أبطال” لسن اعدادى، برنامج “الحساب الذهني”، برنامج “بكره احسن”، برنامج ” طريق النجاح والتميز”، برنامج “حياة جديدة”، برنامج “حلمك مشروعك” وبرنامج “ابدأ مشروعك”.
